يوم احنا صغار

((شوفوا اللي يدخل ومايرد بزعل منه ))
*
*
*
يا زين يوم إني أنا وانتي صغار
توما لبست شماغ وانتي عبايه


بالطول ما ناصل ولا خمسة أشبار
دايم نقيس أطوالنا بالمرايه


ما بيننا شين نخبيه واسرار
ما غير لعب أطفال كل الحكايه


ما همنا موجز ولا نشرة أخبار
التسليه صارت وسيله وغايه


وان جا فلم كرتون للقطو والفار
نجلس نتابع قصته للنهايه


بالمدرسه نزعل على شان الأصفار
انتي سبب لعبك وانا من غبايه


يا ما تهاوشنا على كيس فيشار
أنحاش به وافرح بطردك ورايه


وان قلتي يا (******) يا ويلك من النار
أخاف واستسلم وابين خطايه


والى ضربتيني تقل بيننا ثار
وان قلت كافي قلتي ما هو كفايه


والى خلصتي ضرب بيمين ويسار
أخذتي الفيشار واللي معايه


والى زعلت وقلت أبا أروح للدار
صحتي وقلتي آسفه يا غلايه


وأصدقك وافرح بعد ذيك الأعذار
وأجيك لا حاقد والا احمل وشايه


بس لو أشوفك مع بشر غيري أغار
لو كان أخوي أو من أعز اصدقايه


واركض لخوك أقول شفها مع اكبار
عشان يفرض لي عليك الوصايه


هذي طفولتنا براءه وتذكار
دايم نحن اليا ذكرنا البدايه


واليوم أبا اكتبها سواليف واشعار
وافكر انتجها بفلم و روايه